ကြိုတင်မဲကိစ္စကြောင့် မဲပေးသူနှင့် မဲရုံမှူး ထိုးကြိတ်မှုဖြစ်ပွား

မဇ္ဈိမမှ ကူးယူဖော်ပြသည်။

ချင်းမိုင်။ ။ ပဲခူးတိုင်း ပြည်ခရိုင် သဲကုန်းမြို့နယ်တွင် ကျင်းပသည့် မေလ ၁ဝ ရက် ဆန္ဒခံယူပွဲတွင် ရွာသားတဦးကို မဲရုံမှူးမှ လက်သီးနှင့် ထိုးသည့်အပြင် ဖမ်းဆီး ချုပ်နှောင်ထားသည်။

သဲကုန်းမြို့နယ် သစ်နီတောအုပ်စု ဘောဓိကုန်းကျေးရွာ ကျောင်းရှိ မဲရုံသို့ ပန်းပင်ကုန်း ကျေးရွာသား ကိုမြင့်အောင်သည် ဇနီးသည်နှင့်အတူ မဲထည့်ရာတွင် မဲရုံမှူး ဦးလှငွေက ဇနီးဖြစ်သူကို ကြိုတင်မဲ ထည့်ပြီးသဖြင့် မဲထည့်ရန် မလိုတော့ကြောင်း ပြောဆိုပြီးနောက် အငြင်းပွားရာမှ မဲရုံမှူးက ကိုမြင့်အောင်၏ မျက်နှာကို လက်သီးဖြင့် ထိုးနှက်လိုက်သည်။

“မဲသွားပေးပြီး ပြန်အထွက်မှာ ဇနီးသည်ကို “ကြိုတင်မဲ ယူထားပြီးပြီ။ ဒီနေ့ ထည့်ဖို့ မလိုတော့ဘူး” ပြောတာကို ကိုမြင့်အောင်က “ဘာဖြစ်လို့ လက်မခံတာလဲ၊ ဒီနေ့ ထပ်ပေးချင်တယ်” လို့ ပြောတာကို သူ(မဲရုံမှူး) က “မင်း ... သိပ်လူပါးဝပါလား” ဆိုပြီးတော့ မျက်နှာကို ထိုးလိုက်တယ်” ဟု ဒေသခံ မျက်မြင်တဦးက မဇ္ဈိမကို ပြောသည်။

သို့သော် မဇ္ဈိမအနေဖြင့် အမှုနှင့် ပတ်သက်၍ သီးခြား အတည်ပြုနိုင်ခြင်း မရှိသေးပါ။

အခင်းဖြစ်ပွားပြီးနောက် ကျောင်းဆရာမ ဒေါ်ချိုချိုမော်မှ မဲရုံ ဖွင့်လှစ်ထားသည့် ကျောင်းဝင်းကို ပိတ်လိုက်ရသည်။ အဆိုပါ မဲရုံသည် မြို့နယ်အတွင်းရှိ မိဆူးကုန်း၊ ပန်းပင်နှင့် ဘောဓိကုန်းရွာသားများလည်း လာရောက် မဲထည့်သည့် နေရာဖြစ်သည်။

ကိုမြင့်အောင်သည် ရွာသား ၁ဝဝ ခန့်နှင့်အတူ သဲကုန်းမြို့ ရဲစခန်းသို့ တိုင်ကြားသဖြင့် ရဲစခန်းမှူးသည် မယက အဖွဲ့ဝင် ဦးကျော်ခိုင်နှင့်အတူ အခင်းဖြစ်ရာသို့ လိုက်သွားစဉ် မဲရုံမှူးကို စတင်၍ လက်သီးနှင့် ထိုးသောကြောင့် ဝိုင်းဝန်း ထိန်းချုပ်ခဲ့ခြင်း ဖြစ်ကြောင်း မဲရုံ တာဝန်ရှိသူများက ထွက်ဆိုကြသဖြင့် ကိုမြင့်အောင်ကိုသာ မြို့နယ်ရဲစခန်း အချုပ်တွင် ဖမ်းထားသည်။

မျက်မြင်တွေ့ရှိသူက “အထိုးခံရတဲ့ သူက တရားစွဲခံရလို့ ရွာသားတွေနဲ့ ရွာဦးကျောင်း ဘုန်းကြီးတွေက လုံးဝ မကျေနပ်ဘူး။ သက်သေတွေ ရှိတယ်။ အဲဒီလို မဲရုံမှာ ကြံ့ဖွံ့တွေ၊ ရဲတပ်ဖွဲ့ဝင်တွေ၊ အမျိုးသမီးရေးရာ အဖွဲ့တွေ ရှိတာကို အရပ်သား တယောက်ကနေ အကြောင်းမဲ့ မဲရုံမှူးကို လက်သီးနဲ့ ထိုးတယ်ဆိုတာ စဉ်းစားရဲမှာ မဟုတ်ပါဘူး” ဟု ပြောသည်။