မုန်တိုင်းဒဏ်သင့် ဒုက္ခသည်များ လမ်းပေါ်ထွက် တောင်းရမ်းနေရ

မဇ္ဈိမမှ ကူးယူဖော်ပြသည်။

ချင်းမိုင်။ ။ ရန်ကုန်တိုင်းနှင့် ဧရာဝတီတိုင်းရှိ မုန်တိုင်းနှင့် ရေလှိုင်းဒဏ်သင့် ကျေးရွာများတွင် ကူညီထောက်ပံ့မှု မရသဖြင့် ဒုက္ခသည် ရွာသားများသည်
ကားလမ်းပေါ် ထွက်ကာ တောင်းခံနေရသည်။

ရန်ကုန်တိုင်း ကော့မှူးမြို့နယ် ဘုရားလမ်း ရပ်ကွက်ရှိ ဘုရားလမ်းထိပ်မှ ကွမ်းခြံကုန်းမြို့သို့ သွားသည့် ကားလမ်းဘေးတွင် လေဘေး ဒုက္ခသည် ၆ဝ ခန့်သည် 'ဒုက္ခသည်များကို ကူညီပါ' ဆိုသည့် ဆိုင်းဘုတ်ကို ကိုင်ဆောင်ကာ လမ်းပေါ်ထွက် တောင်းခံနေရခြင်း ဖြစ်သည်။

"တနင်္ဂနွေနေ့မှာ ကော့မှူးမြို့ ဘုရားလမ်းထိပ်မှာ ကျမတို့ ရွာသား ၆ဝ လောက် ထွက်ပြီးတော့ ကွမ်းခြံကုန်းကို သွားတဲ့ အလှူရှင် ကားတွေပေါ့။ ကျမတို့က 'ရေဘေးဒုက္ခသည်များကို ကူညီပါ' ဆိုတဲ့ ဆိုင်းဘုတ် ကိုင်ပြီးတော့ စောင့်နေကြတာ။ အလှူရှင်တွေက ဆန် ၁ဝ အိတ်နဲ့ ပဲ ၂ အိတ် ချပေးသွားတယ်" ဟု ဒုက္ခသည် အမျိုးသမီးတဦးက ပြောသည်။

အလှူရှင် ကားများပေါ်တွင် လိုက်ပါလာသည့် အစ္စလာမ် ဘာသာဝင်များက ကျပ်ငွေ ၂ သိန်းခွဲနှင့် သန့် စိုက်ပျိုးရေး မိသားစုမှ အဆိုပါ ဆန်အိတ်နှင့်
ပဲအိတ်များကို ကူညီ ထောက်ပံ့သွားခြင်းဖြစ်သည်။

ဒုက္ခသည်များက လမ်းဘေးတွင် ယခုလို ထိုင်စောင့်ကာ အလှူခံနေခြင်းကို ရယက အတွင်းရေးမှူး ကိုသန်းကြိုင်က 'မင်းတို့ တော်တော်ရူးနေ ကြပြီလား။ မင်းတို့ တောင်းတာ အရေးမကြီးဘူး။ အစိုးရ သိက္ခာကျတယ်' ဟု ဆိုကာ ကော့မှူးရဲစခန်းသို့ သွားရောက် တိုင်ကြားသဖြင့် ကော့မှူး ရဲစခန်းမှူးနှင့် ရဲသား ၁၅ ဦးက လက်နက်များ ကိုင်ဆောင်ကာ ရွာသားများကို မတောင်းခံရန် ခြိမ်းခြောက်သွားသေးသည်။

ကျေးရွာသား ၃ဝဝ ခန့်သည် မုန်တိုင်းဒဏ်ကြောင့် စားစရာမရှိ၍ ကော့မှူးမြို့နယ်ရှိ သံတာ ရာမကျောင်း၊ ဆုတောင်းပြည့် တောရကျောင်း၊ ဝိဇောဓိရ ကျောင်းများမှ ဘုန်းကြီးကျောင်းများတွင် နေထိုင်နေကာ ဘုန်းကြီးကျောင်းများရှိ သီတင်းသုံးနေသည့် သံဃာ ၆၃ ပါးက နေ့စဉ် ဆွမ်းခံထွက်ကာ ကျွေးမွေးစောင့်ရှောက်နေရသည်။

ဘုန်းကြီးကျောင်းများက ဆန်၊ ဆီ၊ ဆား လှူရန် ဒေသတွင်း၌ ထုတ်ဖော် ကြေညာထားသော်လည်း ယနေ့တိုင် လှူဒါန်းပစ္စည်းများ မရရှိသေးပါ။

"ကော့မှူးမြို့နယ် သံဃနာယက ဥက္ကဋ္ဌ ဆရာတော် ဦးဝိသုဒ္ဓက အခုလို မြင်တွေ့နေရတာကို ကမ္ဘာသိအောင် မီဒီယာကနေ ပြောပေးပါလို့ ပြောတယ်။ အခုတော့ ရဟန်း၊ သံဃာတွေ နေ့တိုင်း ဆွမ်းခံ ထွက်နေရတယ်လေ။ မယက တွေက ပြောကြတယ်။ ဒီအကြောင်းတွေကို သတင်းကနေ မအော်ပါနဲ့ နေ့တိုင်း ကြက်ဥရယ်၊ ဆန်ရယ်၊ ဆီရယ်ကို ဘုန်းကြီးကျောင်းတွေကို ပေးမယ်လို့ ပြောပြီး အခုထိ မရရှိသေးဘူးလို့ ဆရာတော်က ပြောပါတယ်။ ပြီးတော့ ဒကာ၊ ဒကာမတွေကို ကျွေးနေရတယ်။ အဲဒါကြောင့် နိုင်ငံတကာက အမြန် ကူညီပါတော့လို့ ကျမ ပြောချင်ပါတယ်။ အခုအချိန်မှာ မကူညီနုိုင်ဘူးဆိုရင် ပြည်သူတွေကို ဆင်းရဲဒုက္ခတွေကနေ လုံးဝ မကယ်နိုင် တော့ဘူးလို့ ကျမ အပြည့်အဝ ယုံကြည်တယ်" ဟု ဒေသခံ အမျိုးသမီးတဦးကလည်း ပြောသည်။

ဧရာဝတီတိုင်း ဖျာပုံခရိုင် ကျိုက်လတ်မြို့နယ် အရှေ့ဆင်းရဲအုပ်စု ကျေးရွာများနှင့် 'ရေကြိုကျေးရွာများရှိ အိမ်ခြေ ၅ဝ ခန့်အနက် ၄ဝ ခန့်မှာ နာဂစ် လေမုန်တိုင်းကြောင့် ပျက်စီးနေသော်လည်း ထောက်ပံ့ကူညီမှု တစုံတရာ မရောက်ရှိသေးကြောင်း အမျိုးသား ဒီမိုကရေစီအဖွဲ့ချုပ် (ဗဟို) မှ ပြန်ကြားရေး တာဝန်ခံတဦးက ပြောသည်။

ရွာသူရွာသားများ အိုးမဲ့အိမ်မဲ့ ဖြစ်ကာ ယခုအချိန်အထိ ဒုက္ခစခန်း ဖွင့်လှစ်ခြင်း၊ ရေဘေးဒုက္ခ ကယ်ဆယ်သူမှ လာရောက် ဆက်သွယ်ခြင်း၊ ကူညီထောက်ပံ့ခြင်းများ မရှိသေးပါ။

ထို့အပြင် လေမုန်တိုင်း တိုက်ခိုက်မှုကြောင့် ကျေးရွာပတ်လည်ရှိ ရေသွင်း ရေကန်အားလုံးမှာ ရေဆိုးရေညစ်များ ဖြစ်နေသဖြင့် သောက်သုံးရေ သန့်ရှင်းမှု မရှိ၍ ယခုချိန်တွင် ဝမ်းရောဂါများ စတင်ဖြစ်ပေါ်နေပြီ ဖြစ်သည်။

ဒုက္ခများသည် ယခုထိ မည်သည့် အကူအညီမှ မရသဖြင့် ရေကောင်းရေသန့် မရှိခြင်း၊ စားဝတ်နေရေး ပြဿနာ ရင်ဆိုင်နေရခြင်းကြောင့် ကျေးသားများသည် နောက်ထပ် ၄-၅ ရက်ကြာလျှင် အသက်အန္တရာယ်ပါ ထိခိုက်လာနိုင်သဖြင့် လိုအပ်သည် ရေကောင်းရေသန့်များနှင့် ဆေးဝါးများကို ကူညီ ထောက်ပံ့ကြစေလိုကြောင်း အဆိုပါ ဒေသရှိ ရွာသားတဦးက ပြောသည်။

"အကူအညီ ဝင်နေတာတော့ သိတယ်။ ကြားမှာ ပျောက်နေတဲ့ နေရာတွေမှာ ဆက်သွယ်ပြီးတော့ သေသေချာချာ ပြောတာကို မရဘူး ဖြစ်နေတယ်။ အကူအညီ မရဘူး ဖြစ်နေတယ်။ ကြားထဲမှာ လုပ်စားတဲ့ လူရှိမယ်လို့ ကျနော် ထင်တယ်" ဟု အဆိုပါ ရွာသားက ဆက်ပြောသည်။