၂၀၀၇ စက်တင်ဘာ သံဃာ့အရေးအခင်းတွင် သံဃာ့တော်များအတွက် အလေးပြုသော သီချင်း ၂ ပုဒ်၊ ယခု ၂၀၀၈ မေလ နာဂစ်မုန်တိုင်း အရေးအခင်းတွင်လည်း ဒုက္ခသည်များကို ၀ိုင်းဝန်းကူညီကြရန် တိုက်တွန်းသော သီချင်း ၁ ပုဒ် သီဆို ဖြန့်ချိပြီး ပရိသတ်အတွက်၊ သံဃာတော်တို့အတွက်နှင့် မြန်မာပြည်အတွက် မိမိအနုပညာဖြင့် စဉ်ဆက်တစိုက် လှူဒါန်းသူ ၀ါရင့် ဂီတအနုပညာရှင် မာမာအေးသည် လာမည့် ဇွန် ၁၄ နှင့် ၁၅ တွင် ကယ်လီဖိုးနီးယား၊ ဆန်ဖရန်စစ္စကို ဘေးဧရိယာသို့ လာရောက်မည် ဖြစ်သည်။
မြန်မာအမေရိကန် အမျိုးသမီးအသင်းက ကြီးမှူးသော ဒေါ်အောင်ဆန်းစုကြည် ၆၃ နှစ်မြောက် မွေးနေ့ အထိမ်းအမှတ်အခမ်းအနားက ဇွန် ၁၄ တွင်၎င်း၊ မြန်မာမိသားစုများ ပူးပေါင်းစီစဉ်သော နာဂစ်မုန်တိုင်း ကယ်ဆယ်ရေး ရန်ပုံငွေပွဲက ဇွန် ၁၅ တွင်၎င်း အသီးသီး ကျင်းပကြမည်ဖြစ်ရာ ထိုပွဲတော်များတွင် ဒေါ်မာမာအေးက ဂီတအနုပညာဖြင့် စေတနာဒါနပြုပေးမည် ဖြစ်သည်ဟု သိရသည်။
နှလုံးအားနည်းသဖြင့် ၂၀၀၇ တွင် ခွဲစိတ်ကုသထားရသော ဒေါ်မာမာအေးသည် တိုင်းပြည်အရေး မအေးသဖြင့်၊ သံဃာတော်များ အရေးပေါ်နေကတည်းက အမျိုးသားရေး ပွဲတော်များသို့ သွားရောက်ပြီး မိမိ အနုပညာဖြင့် အားစိုက်ဆောင်ရွက်နေခဲ့ရာ ယခု နာဂစ်မုန်တိုင်း အရေးအခင်းကြီးတွင်လည်း သံဃာတော်များ၏ လေဘေးကယ်ဆယ်ရေး ဆောင်ရွက်မှုများကို မိမိအသံကို လှူပြီး လိုက်လံ ကြိုးပမ်းမည်ဟု ကတိပေးလျက် လှုပ်ရှားလျက်ရှိသည်။
ဘီဘီစီ မြန်မာပိုင်း အစီအစဉ်တွင်လည်း အချိန်ပိုင်းဆောင်းပါးရှင်အဖြစ် အစီအစဉ်များကို တက်ဆက်နေသည့်အတွက် ပြည်တွင်းက မြန်မာပြည်သူတို့အနေဖြင့် ဒေါ်မာမာအေးနှင့် အဆက်ပြတ်သွားသည်ဟု မဆိုနိုင်ပေ။ ၄င်းနေထိုင်ရာ အင်ဒီရာနာ၊ ဖို့ဝိန်းတွင်လည်း မြန်မာမိသားစုများ၏ ကျန်းမာရေးစောင့်ရှောက်မှု လုပ်အားပေးအစီအစဉ်များတွင် စေတနာရှင်တဦးအဖြစ် အပတ်စဉ်သွားရောက် ဆောင်ရွက်ပေးလျက်ရှိသည်ကို တွေ့ရသည်။ မိုးမခ၏ အကြံပေး နာယကတဦးအဖြစ်လည်း မောင်စွမ်းရည်၊ ဦးဝင်းဖေတို့နှင့်အတူ ရပ်တည်ပေးလျက် ရှိသည်။
Monday, June 9, 2008
အနုပညာရှင် မာမာအေး ဘေးဧရိယာ အမျိုးသားရေး ရန်ပုံငွေပွဲများတွင် မေတ္တာဖြင့် ဖျော်ဖြေမည် (Moemaka)
Subscribe to:
Post Comments (Atom)
No comments:
Post a Comment