ဒီချုပ်ပါတီဝင်တဦး စစ်ကြောရေးတွင် ရိုက်နှက်ခံရသဖြင့် သေဆုံး

မဇ္ဈိမမှ ကူးယူဖေါ်ပြသည်။

နာဂစ်မုန်တိုင်း ရန်ကုန်သို့ ကျရောက်သည့် စနေနေ့ နံနက်ပိုင်းက အင်းစိန်ထောင် အဆောင် ၁ တွင် မီးလောင်မှုနှင့် ဖြစ်ပြီး ရုန်းရင်းဆန်ခတ်ဖြစ်စဉ် ထောင်လုံခြုံရေး တပ်ဖွဲံများက ပစ်ခတ်သဖြင့် အကျဉ်းသား ၃၆ ဦးသေဆုံးကာ ၇၀ ဦး ထိခိုက်ဒဏ်ရာ ရရှိခဲ့သည့် အမှုအခင်းတရပ် ဖြစ်ပွားခဲ့သည်။

သေဆုံးသူများတွင် ရန်ကုန်တိုင်း ဒေါပုံမြို့နယ်မှ အန်အယ်ဒီ စည်းရုံးရေးအဖွဲ့ဝင် ကိုအုန်းကျော်လည်း ပါဝင်ပြီး အာဏာပိုင်များက သူ့ကို ထောင်ဖောက်ရန် ကြိုးပမ်းသည်ဟု စွပ်စွဲကာ ရိုက်နှက် စစ်ဆေးသဖြင့် သေဆုံးခဲ့ရသည်ဟု အမျိုးသားဒီမိုကရေစီ အဖွဲ့ချုပ် (လွတ်မြောက်နယ်မြေ) သတင်းအရ သိရသည်။

ကိုညိုအုံးမြင့် (နိုင်ငံခြားရေး တာဝန်ခံ အန်အယ်ဒီ၊ လွတ်မြောက်နယ်မြေ) နှင့် မဇ္ဈိမ ဆက်သွယ် မေးမြန်းချက်ကို တင်ပြလိုက်ပါသည်။

အင်းစိန်ထောင် မီးလောင်တဲ့ အထဲမှာ အန်အယ်ဒီ အဖွဲ့ဝင်တဦး သေဆုံးသွားတဲ့ အကြောင်း ပြောပြပါရှင်။

ကျနော်တို့ အထဲမှာရှိတဲ့ အန်အယ်ဒီက ကျနော်တို့ လုပ်ဖော်ကိုင်ဖက်တယောက် ထောင်ဝင်စာ သွားတွေ့တဲ့ နောက်တနေ့မှာ သိရပါတယ်။ မီးလောင်နေတဲ့ အချိန်မှာ သူတို့အမိုးတွေက တချို့နေရာတွေမှာ ပွင့်နေကြတော့ ထွက်ပြေးဖို့ကြိုးစားတဲ့အခါမှာ သူတို့အပစ်ခံရတယ်လို့ ကြားတယ်၊ တချို့က ပြုတ်ကျပြီးတော့ သေဆုံးတယ်လို့ ကြားရပါတယ်။ အဲမှာ ကျနော်တို့ အဖွဲ့ဝင်တယောက် ပါသွားပါတယ်။

သူက ဘယ်လို သေဆုံးသွားတာလဲ။ သေနတ်ဒဏ်ရာနဲ့ ဆုံးသွားတာလား။

မဟုတ်ပါဘူး၊ သူက သေနတ်နဲ့ မဟုတ်ပါဘူး။ သူက စစ်ကြောရေးမှာ ဒီလို ထောင်ဖောက်တယ်လို့ အကြောင်းပြပြီးတော့ ရိုက်နှက်ခံရပြီးတော့ သေဆုံးသွားတာ ဖြစ်ပါတယ်။

စစ်ကြောရေးမှာက ဘယ်နှစ်ယောက် သေသွားလဲရှင်။

စစ်ကြောရေးမှာ ခေါင်းမိုးပေါ်ကနေ တက်ပြီးတော့ အကျဉ်းသားတွေကို ထွက်ပြေးဖို့ ဦးဆောင်ခဲ့တယ် ဆိုပြီးတော့ အကြောင်းပြချက်နဲ့ လူ ၄ ဦးကို ခေါ်ပြီးတော့ လူရှေ့သူရှေ့မှာ စစ်ရင်းရိုက်ရင်းနဲ့၊ စစ်ကြောရေးဆိုတာ ဒီ ထောင်အပြင်မှာပါပဲ။ ဒီလောက် မုန်တိုင်းဖြစ်နေတဲ့ အချိန်မှာ ဒီလူတွေက သူတို့ အကြောင်းပြချက်ကတော့ မီးလောင်တာကို၊ မီးလောင်တဲ့အခါ ထွက်ပြေးတာလို့ ဆိုပြီးတော့ ထောင်ဝန်ထမ်းတွေက ရိုက်ပြီးတော့ သေဆုံးသွားတယ်။ အဲဒီ အလောင်းကို မိသားစုကို အကြောင်း ကြားပြီးတော့ ကျနော်တို့ သိရပါတယ်။

အခု သေဆုံးသွားတဲ့ အန်အယ်ဒီတဦးရဲ့ အမည်နဲ့ တာဝန်ကို ပြောပြပါရှင်။

ဒေါပုံမြို့နယ်က အန်အယ်ဒီ မြို့နယ် စည်းရုံးရေးအဖွဲ့ဝင် ကိုအုန်းကျော်ပါ။ အသက်ကတော့ မသိလိုက်ဘူး။

သူက ဘယ်တုန်းကနေ အကျဉ်းချခံနေရတာလဲရှင်။

သူက ၂၀၀၇ ခုနှစ် စက်တင်ဘာ အရေးအခင်းမှာ ဖမ်းဆီးခံရသူ ဖြစ်ပါတယ်။ သူ့လို နိုင်ငံရေး အကျဉ်းသမား၊ ကျနော်တို့ အန်အယ်ဒီကနေ စုစုပေါင်း ပထမ ဖမ်းခံရတာ ရှိပါတယ်။ နောက်ပိုင်းမှာ ပြန်လွှတ် ပေးပြီးတော့မှ ၁၇၀ ကျော်ကို ထောင်ထဲမှာ အကျဉ်းချပြီးတော့ အမိန့် ချလိုက်ပါတယ်။ ကိုအုန်းကျော်က အမိန့် ချခံရတဲ့ထဲမှာ တဦး ဖြစ်ပါတယ်။

ဘယ်လိုအမှုနဲ့ စွဲဆိုထားပါသလဲရှင်။

သူ့ကို ၅ (ည) ရှိတယ်။ ၁၇ (၁) ရှိတယ်။ ဖြစ်နိုင်တာကတော့ သူက စက်တင်ဘာ အရေးအခင်းတုန်းက တိုင်းပြည်ကို ဆူပူအောင် လှုံ့ဆော်မှုနဲ့ ဖမ်းခံရတဲ့ထဲက တဦး ဖြစ်ပါတယ်။

ကိုအုန်းကျော်ရဲ့ အလောင်းနဲ့ ပတ်သက်ပြီး ဘယ်လိုလုပ်ကြတာလဲရှင်။

ကျနော်တို့ သိရသလောက်က သူ့မိသားစုကို သူတို့ အကြောင်းကြားတယ်။ စစ်ကြောရေးမှာ သေတယ်ဆိုတာ လောက်ပဲ သိရတယ်။ အလောင်းကို ပြန်ပို့ပေးလား၊ မပေးလား ဆိုတာကို ကျနော်တို့ သေသေချာချာ မသိရပါဘူး။

မီးက ဘယ်လိုကနေ စလောင်တယ်ဆိုတာ သိရသလောက် ပြောပြပါရှင်။

စနေနေ့ပေါ့နော်။ မုန်တိုင်း ၀င်ပြီးတဲ့ အချိန်မှာ အမိုးတွေ လန်ထွက်သွားတယ်။ အဲဒီအတွက်ကြောင့် သူတို့ကို နေရာ ပြောင်းခိုင်းတယ်။ လူတွေ အရမ်းကို အေးနေတော့ မီးလှုံဖို့ ကြိုးစားရင်း မီးလောင်တယ်၊ ထောင်ဆူတယ်လို့ အာဏာပိုင်တွေဘက်က ပြောတယ်။ အကုန်လုံးက ထွက်ပြေးဖို့ ကြိုးစားကြတဲ့ အချိန်မှာ၊ ခေါင်းမိုး ပွင့်နေတဲ့အခါ ထွက်ပြေးဖို့ ကြိုးစားတဲ့အချိန်မှာ သေနတ်နဲ့ ပစ်ခံရတယ်။ အပေါ်ကနေ ပြုတ်ကျပြီးတော့ သေတဲ့လူ ရှိသလို နောက် မနက်ပိုင်းကျတော့ ထွက်ပြေးရတဲ့ လူတွေကို အကြံပေးတယ် ဆိုပြီးတော့ လူ ၄ ဦးကို ဦးဆောင်တဲ့အထဲ ပါတယ်ဆိုပြီးတော့ ရိုက်တယ်လို့ သိရတယ်။